దేవికిదే పూజ పాదపూజ | Devikide Pooja Pada Pooja

దేవికిదే పూజ పాదపూజ

వసంతరాగం, ఆది/ఏక తాళం

సంగీతం : ప్రణవి మొక్కరాల

గానం : మొక్కరాల కామేశ్వరీగారు

Audio

దేవికిదే పూజ పాదపూజ

మంచి మనస్సుతో చేసే మల్లెల పూజ

కలకాలము దేవికి కనకాంబరమాల

చేయి వదల రాదని చేమంతులమాల

మోహక్షయకారిణికి మొగలిపూలమాల

దయతలిచే తల్లికి దవనపుమాల

దేవికిదే పూజ పాదపూజ

గుండెలోన దేవికి గులాబీలమాల

సర్వాంతర్యామికి సంపెంగలమాల

మమతల మాతల్లికి మాలతీమాల

ప్రేమైక్య మూర్తికి పొన్నమాల

దేవికిదే పూజ పాదపూజ

నాదస్వరూపిణికి నాగమల్లెమాల

మందస్మిత వదనకు మందారమాల

తీయని పలుకుల తల్లికి తులసీదళమాల

మనసెరిగిన తల్లికి మరువపుమాల

దేవికిదే పూజ పాదపూజ

చల్లని చూపల తల్లికి చంపకమాల

కరుణాలవాలకి కమలపూలమాల

కలిదోషహారిణికి కలవపూల మాల

సుగుణాల రాశికి సన్నజాజి మాల

దేవికిదే పూజ పాదపూజ

దేవికిదే పూజ పాదపూజ

మంచి మనస్సుతో చేసే మల్లెల పూజ

దేవికిదే పూజ పాదపూజ...పాదపూజ...పాదపూజ